பதுக்கி வச்ச பணம்

நீ பருவமடைவதை எதிர்பார்த்து

பதுக்கி வச்ச பணமெல்லாம்

கணக்குல காட்டப்படாத

கருப்பு பணமில்ல எம்மகளே

குடிகார தந்தையிவன்

குடிச்சே தீர்த்திடாம

காப்பாத்தி வச்ச பணம்

தான் காச காப்பாத்த

துண்டு போட்டு நிற்கின்றோம்

சிறுக சிறுக சேர்த்த காசு

சத்தமில்லாம செல்லாதுன்னா

செத்துப்போன பணத்த

சேர்த்துவச்சதன் பயனென்ன?

கருப்பு பணம் ஒழிஞ்சிட்டுன்னு

கத்துற பயலுவெல்லாம்

ட்விட்டரு அக்கவுண்டு

ரெண்டு மூணு வச்சிருக்காய்ங்க

கியு கட்டி நிக்கும் நாங்க

ஒத்த வங்கி அக்கவுண்டுமில்ல

என்னத்தையா ஒழிச்சுப்புட்டீக?

ஒழிச்சதெல்லாம் ஒன்னே ஒன்னு

எம்ம சணம் நிம்மதியத்தான்..

கண்ணுப்படபோகுதையா…

இளையராஜாவின் ஓவியம்

பின்னமர்ந்து பயணிக்கும் தாயவளின்

மடியிலமர்ந்து விரல் சுப்பிக்கொண்டு

பயணிக்கின்றேன் தந்தையவனின்

ஈருருளியில்

வானத்தில் பார்த்தேன்

நிலவென்னை பின் தொடர்கிறது

வீதியைப் பார்த்தேன்

பதுமை ஒருத்தி முத்தம் கொஞ்சினாள்

விந்தையாய் நான் திரும்ப

அண்ணன் ஒருவன் கண் சிமிட்டினான்

வீட்டிற்கு வந்தவுடன்,

உப்பை கையில் அடக்கி

என் முகத்தைச் சுற்றி

கால் கைகளை உரசி

தூவென்று துப்பச்சொல்லி

ஊருக்கண்ணெல்லாம் உதறித் தள்ளிவிட்டாள்

கண்ணுப்படபோகுதையா என்று…

சாயி! சாயி!

பிச்சையெடுத்து உண்ட மகான்

பளிங்கு சிலையில்

பள பள உடையில்

வைரத்தில் கிரீடமென

பணக்காரக் கடவுளானார்

வியாழக்கிழமையென்றால்

வழியெல்லாம் மகிழுந்து

 ஹாரன் சத்தத்தில்

ஆக்ஸிஜன் இல்லா நெருக்கடியில்

அவர் பாதம் நோக்கி ஒடுகின்றனர்

அத்தனை மக்களும்

அவர் போல மனிதனாய் வாழ்ந்துவிட்டு

போனாலே பூவுலகம் எங்கும்

புன்னகை மலரும்

மகான்களுக்கு மார்க்கெட்டிங் எதற்கு ?

மனதில் அவரை நிலைக்கச்செய்தால்

அதைவிட இறைபக்தி

எதுவும் இல்லையே…

சாயி! சாயி!